“Uşaq Endokrinologiyasında Müasir Yanaşmalar” adlı elmi proqram 26–27 noyabr 2026-cı il tarixlərində Bakıda keçiriləcək və türkdilli ölkələrin pediatr endokrinoloqlarını bir araya gətirəcəkdir. Tədbir TAPES – Türk Pediatrik Endokrin Dərnəkləri Birliyi tərəfindən təşkil olunur.

Tədbirin əsas məqsədi uşaq endokrinologiyası sahəsində aktual elmi və klinik mövzuların müzakirəsi, ölkələrarası təcrübə mübadiləsinin gücləndirilməsi və gələcək əməkdaşlıq imkanlarının yaradılmasıdır.

İki günlük proqramda uşaq diabeti, boy geriliyi, qalxanabənzər vəzi xəstəlikləri, böyrəküstü vəzi pozğunluqları, pubertat problemləri, cinsiyyət inkişafı pozğunluqları, D vitamini metabolizmi, raxit, uşaq piylənməsi, süni intellekt və rəqəmsal texnologiyaların pediatrik endokrinologiyada rolu kimi mühüm mövzular müzakirə olunacaqdır. Konfransda Azərbaycan, Türkiyə/TRNC, Özbəkistan, Qırğızıstan və Qazaxıstandan mütəxəssislərin iştirakı nəzərdə tutulur.

Bu tədbir yalnız elmi toplantı deyil, eyni zamanda türkdilli ölkələrin pediatr endokrinoloqları arasında davamlı əməkdaşlıq, ortaq layihələr və peşəkar şəbəkələşmə üçün mühüm platforma olacaqdır.